بلدنا ومش النا

مبارك لنواب البرلمان مبارك مش بسبب فوزهم بالانتخابات البرلمانية فهي ما كانت سوى البدايه ببارك بسبب ما حققه النواب الان من اموال ونجاحات (زيادة 500 دينار اردني على ال 3000 في اول شهر في المجلس ) (اعفاءات من الجمارك وتأشيرات للحج والجواز الاحمر والحصانه والمنصب والكرسي ) فقط في اول الشهر اللهم لا حسد (وبحكولك مصاري الدولة وين !!)

والاحلى احنا بطلع علينا 600 دينار فاتورة كهرباء خلال شهرين سرقه وظلم ومجبورين ندفعهم وما بنلاقي حدا يسمعنا والنواب طبعا مش فاضيين لأنهم بحلوا مشاكل الدولة الاضخم . واللي لفت انتباهي اكثر شيء ان سيادة النائبة الدكتورة فلان الفلان طول نهارها تحكي عن الفساد والمفسدين وعن حقوق الشعب وفي اول جلسة في البرلمان نامت وبالصدفه صورتها العدسة وهي غفيانة وطبعا ليش يا ترى؟؟؟ اكيد طول الليل سهرانه تحل بمشاكل البلد !!!

ما اخذنا شيء من الانتخابات غير البهدلة ووجع الراس احنا بنلمع الكراسي والنواب برتاحوا عليها . يا خوفي من بكرا معقولة يوكلوا البلد كلها واحنا نطلع برا ؟؟ ورئيس الوزراء يلي لهلأ مش عارفين مين يختاروا ليش؟؟ طيب خلص استوردوا واحد من تايوان وريحونا يمكن يطلع متأهل للكرسي !!

واذا مش عارفين مين يكون رئيس وزراء ليش راح الدكتور عبدالله النسور ؟؟ ولّا لأنه رجل صاحب حق وما بعرف يلف ولا يدور وبعرف مصلحة البلد مشان هيك استغنيتو عن خدماته بدكم واحد يمشي ع كيفكم بس حسبي الله ونعم الوكيل وبآلاخر بنصفي عايشين على المعونة خلينا نشوف النواب بشو بدها تنفعك يا بلدنا ..

وغير هيك ازا بتسأل جوليا بطرس الشعب العربي وين؟؟ بنحكيلها عنّا وشو مابدك عّنا الحمدلله بلدنا كبيرة والخير كتير لدرجه انو بنلم العالم من جميع الدول ليقعدوا ويعيشوا عنّا ..هو انا ك شعب ماخدين بالاول حقوقنا لحتى تجيبولنا ناس زيادة؟؟؟

اذا احنا ولاد البلد حاملين ارقام وطنية ويادوب عايشين والله اللي بعيش ياما بشوف ان شاء الله تمرق هالفترة ع خير والله يفرجها علينا وعلى ضيوفنا وما بقول غير حلوة يا بلدي.