كل منا يبدا بنفسه

اعزائي في براسي شوية افكار وقناعات حابب اشاركها معاكم بخصوص المشاكل اللي بالبلد وكلها منبثقة من احاديث الرسول الكريم (ص) : "ان الله لايغير مابقوم حتى يغيروا ما بانفسهم" و " كما تكونوا يولى عليكم" واللي رح احكيه لا استثني نفسي منه بل هو ينطبق علي ايضا في بعض الحالات. واسف على الإطالة. بسم الله الرحمن الرحيم - بتجيب/ي واسطة عشان تاخد الرخصة وانت عارف انك مش كفؤ وبتصير تشكي من الناس انهم مابيعرفو يسوقو.

 بتفوت/ي بسيارتك بالممنوع وبتصف مزدوج وبتسكر عالناس وبتقطع الاشارة حمرا وا وا وا وا , ولما تشوف حدا تاني عامل هيك بتقوِم الدنيا ومابتقعدها. - بترخص/ي سيارتك بالواسطة وهي واقعة من طيارة وبتخنق الناس من الدخنة وريحة الديزل. -

بس تبيع/ي سيارتك بتعمل كل السبل انك تخبي العيوب او البلاوي اللي فيها و ( خلي المسكين يتطبل فيها ). - بتفتح/ي الفيسبوك واشياء اخرى بالشغل ولما تروح على دائرة حكومية او شركة بتشكي انو معاملاتك مابتمشي. - بتاخد/ي اجازة مرضية بالشغل وانت مش مريض وبتجيب تقرير طبي مزيف عشان تاخد يوميتك اللي انت مابتستحقها, او بتطلع قبل بوقت من الشغل وبتخلي حدا تاني يختملك وتنزلك يوميتك كاملة وانت ما اديت الشغل المطلوب منك مقابلها.

 بتنسب/ي نفسك لدورات وانت مدير ومارح تستخدم الدورة وبتسافر للخارج وبتشم الهوا وبالمقابل الموظفين اللي فعلا رح يتحسن انتاجهم لو اخدو هاي الدورة بتتركهم يشتغلو على عماها. - بتستعمل/ي سيارة الحكومة او سيارة الشركة لمشاويرك الشخصية وبتترك سيارتك واقفة بالبيت. - بتسحب/ي خط مي او كهرباء من ورا العداد وبتصرف مي وكهربا ببلاش وغيرك بيدفع كامل والشركة بتغلي الاسعار عشان تغطي الخسائر. - بتنتخب /ي نواب عالمعرفة وعالقرابة وعالمنسف والكنافة او حتى مقابل مصاري وبعدين بتصير تشكي انهم مش عمبمثلوك ولا بجيبو حقوقك وبنامو بالمجلس, طبعا مهمه عارفين انهم رح يفوزو بالدورة اللي بعدها بنفس الاسلوب, وانو مافي حدا من الناخبين رح ياخد موقف منهم.

 بتتجاوز/ي النظام والدور وبتفوت عالمدير اللي بتعرفو او حدا بعتك عليه ( في الاحوال والجوازات والبنوك وا وا وا) ولما حدا يتجاوزك او يفوت عالمدير بتقول وين النظام ووين الدور. - بتعمل/ي واسطات عشان تتجاوز دورك بديوان الخدمة المدنية وبتشكي من المسؤولين الغير كفؤين. - بتوظف/ي عندك ناس غير كفؤة بدل ناس تستحق هذه الوظيفة عشانه قريبك او حدى بعته عليك. - بتحمل/ي نفسك نفقات تلفونات ورصيد ما الها لزوم لاولادك وبتصير تشكي انك مش ملحق.

 بتغير/ي في بياناتك الضريبية. - بتغش/ي بالخبز او بالقهوة او بالحمص او بالكنافة او او او او ...... ولما تروح تشتري سلعة اخرى بتصير تعلق انو غشاش. - اذا غلط البياع معك بالحساب ورجعلك باقي اقل بترجع بتشل بختو اما اذا غلط واعطاك زيادة بتغطرش. - بتزور/ي بمعلوماتك عشان تاخد الدعم وانت عندك قدرة انك تتحمل الغلاء, وفي ناس بتستاهل اكتر ومش عارفة تاخد دينار زيادة . وما غفلت عن ذكره اكيد اعظم واكثر. وايا كنت/ي او كانت وظيفتك ممكن تقيس على نفسك. اتحدى اي شخص انو مايكون عنده او عمل اي مما ذكر اعلاه.

فطالما عندك الجرأة او ضميرك بطاوعك على القيام باعمال كهذه وانت عارف انها غلط, فا اكيد اكيد المسؤولين او النواب او الناس اللي ماسكين مناصب ووظائف مهمة بشكل عام رح يكونو بيعملو هيك لانو اللي تحتهم بيعملو نفس الشي وبالتالي مش رح يستحو منهم يعني مثلا: مسؤول بيجيه واحد من موظفينه وبيطلب انو يوظفله شخص من اقاربه مش كفؤ اكيد – لانو لو كفؤ كان دبر حاله لحاله – فا بيوظفله ياه وبالتالي لما المسؤول يطلب من الموظف اللي تحته اي طلب مش قانوني اكيد رح يلبيله ياه بطبيعة الحال , والعكس بالعكس ..... وعلى ذلك قس.

اللي بدي اقوله باختصار اصلح نفسك بالاول وبعدين اطلب من الناس انها تنصلح ومن ضمنهم المسؤولين بشكل عام. يعني لو المسؤولين مش شايفين الناس فاسدين مارح يسترجو يعملو اي اشي غلط..وسلامتكم من خواطري