يا بيه ما احلاك .... يا منتخبنا

يا بيه ما احلاك .... يا منتخبنا دق الفرح بابنا ويا مين يهانينا والمبغضين ابعدوا عنا ولا جونا واحنا نوينا عالفرح ويا ناس صلوا عالنبي ....... واحنا نوينا عالنصر ويا بو حسين لاقينا لا أحلى ولا أجمل من ليلة الفرح الأردنية ؛ أجمل التهاني والتبريكات لسيدنا أبو حسين ولسيدي الأمير علي وللشعب الأردني وللمنتخب الوطني اللي دخل الفرح على كل بيت مبارك يا أردن من الكاتب حكمت محمود البشير كل التهاني و التبريكات . كلنا عشنا ليلة فرح حقيقية ألاف الناس وملايين المشاهدين حضروا وشاهدوا مباراة المنتخب الوطني خلونا نرصد الفرح اللي حدث مع أبو حمدان أثناء متابعته للمباراة ..

أبو سالم : يارب إني طالبك بهاظا اليوم تبيض وجوهنا بالمباراه و يبسطنا بفوز منتخبنا ... أبو حمدان : توكل على الله عسى ما يخيبنا رجا ؛ وبعدين لاتنسى طول ما أبو حسين فوق روسنا ما بننذل ولا بننهان عافى عليك والأمير علي ما قصر والمثل بقول اتعب تلعب وبعدين كلنا بقلوبنا مع المنتخب وفعلا بنزل المنتخب عالساحة وشوف شوف يلة شوف عالمكشوف كيف بلعب وما بتعب .

أبو حمدان : الديوان عنده مليان وشاشة التلفزيون من أكبر الأحجام والصوت عالعالي والأعصاب مشدودة وشوف الأعصاب ببدأ المشوار بالسلام الملكي والهامات عاليه ، وراسك بالعالي مرفوع الهامة ، وانت أردني أرض الكرامة ، وبشهر الكرامة الكرم هل والقول الأول طل ولعيونك يا سيدي أبو حسين وفعلا القول الأول وين لعيون أبو حسين وما خلصت هالنغمات الحلوة إلا والقول الأول جوى الشبكة أمام أعين الملايين وأحلى قول وزغرتيله وصلوا عالنبي قوووووووووووووووووووووووووووووووول (الله أكبر) وأردن يا أردن مين اللي زيك والقول الأول أجا وما حدا قدك ، والكل بالديوان بصوت عالي اللللللللللللللللللللللللللللللللللللللللله أحلى قول وتعالوا شوفوا لما بحمى الدم الأردني وبفور ما برضيه غير الكلاشن وططططططططططططططط ( وكلاشن ابو حمدان بلش يطخطخ ) وحيهم هظول النشامى اللي ينشد بيهم الظهر .

وهذول ربعك يا أبو حسين والله أفراح هلت وعالأردن طلت ومن القويسمة ستاد الملك عبد الله الشعب زغرت والله، أم حمدان : هيه ويا منتخبنا حوطتكوا بالله من عيني وعين الحسود ومن عين اللي ما يذكروا الله ولولولولولولولوليش (زغروته طويلة ) وحيوا البطل حيوه ومنتخبنا الأردني ما بيه زيوه ولو تعرفوا قديش الفرحة عالوجوه اللي بالمدرجات واللي بالشوارع واللي خارج الملعب أكثر من اللي جوى واللي عالراديو يا عمي الشارع الأردني كله حظر تجول كله عينه على الهدف وعاللعب وانزل عالساحة يامنتخبنا والنشامى كله بعطي أقصى طاقاته والجمهور بشجع وبرقص وبغني وبرفرف بالعلم والحكم بنادي بصفيرته وببدأ الشوط الثاني ويله يا شباب اركض انتبه احرص عدوك مليح

وبعد هيك اجى الجول الثاني اللي خلى العيون كلها تدمع فرح وهون بدأت الأعصاب ترتاح ودقائق ويعلن الحكم انتهاء المباراة مبشرا بنتاهل النشامى حاملين الفرحة من عيونهم لعيون الأردنيين ولسيدنا حاملين النصر ومؤمنين إنه النصر من عند الله ويا ريته مبارك علينا وتعالوا اسمعوا أحلى زغروته من أم سالم هيه وحمامات الأردن ارداس ارداس، هيه ومكحلات العين ومشطات الراس ، هيه ويا منتخبنا ما تنداس هيه وتفوز دوم وتقهر كل الناس ولولولولولولولولولوليش .

أبوحمدان ( والكلاشن شغال من الفرحه ) :الأردن عامرة بالفرح وهاظا الفرح سجل اسم الأردن فوق ووصل هالبلد بجهود النشامى لكأس العالم ومن بين كل الشعوب ما بتلاقي أحن من قلوبنا وخلينا نفرح ونفرح حبيبنا وملكنا أبو حسين ومنا اليوم بنرسل كل التحايا وبنقول لكل القائمين على المنتخب بدءا من الرياضي الأول ملك الرياضة ومرورا بسمو الأمير علي ومدير النادي ومدربه وكل من له صلة بالمنتخب بنقول إلهم ينشد الظهر بيكوا والشعب الأردني كله بحييكوا ومبروك للأردن ودايما الإشي الحلو بده حلو، وخلينا نتحلى وبالكنافة الأردنية نتملى

 ابو حمدان : يابه يا حمدان خذ سالم وهالشباب وجيبونا سدرين كنافه لأنه ما بيش أحلى من هيك مناسبه اشي برفع الراس .. هاذا الأردن أردننا وأغلى منه ما عنا ، دايما الغالي لا يليق به إلا الأغلى وفعلا ما قصروا الشباب والله يعطيهم العافية نشامى أبو حسين

ولا يسعنا اليوم ونحن بأجواء الفرح الأردني إلا أن نقول أنه اللي بحب لازم يضحي من أجل حبيبه والشعب الأردني بستاهل إنه يلعب بكاس العالم ويتقدم انشاء الله على أمل التربع دوما في البطولات من أجل الراية الهاشمية تبقى خفاقة وعاليه في جميع المحافل الدولية والرياضية مبروك الهدفين للحبيب نور العين أبو حسين قايدنا وبتظل نفسنا وبنحيا بيك يا سيدنا ودايم العلم مرفرف بالقمه .