علقت الإعلامية رضوى الشربيني عبر برنامجها "هي وبس"، والذي تقدمه عبر قناة "cbc سفرة"، على واقعة سجود عروس الفنان حسن شاكوش، خلال حفل زفافهما، والتي أثارت ضجة كبيرة على وسائل التواصل الاجتماعي، مؤكدة أن حرية التعبير مكفولة للجميع.

وقالت "الشربيني"، إن كثيراً من الناس طالبوها بالتعليق على تلك الواقعة مضيفة: "هقول إيه، ست فرحانة بتعبر عن فرحتها، يمكن هي شايفة حسن شاكوش الراجل اللي تعمله الحركة دي في الفرح قدام الناس".

وأضافت: "صحيح هي حركة أوفر جدًا، وآخر حاجة كنا بنشوفها إن لعيبة الكورة يسجدوا لما يجيبوا جون، آخر حاجة شوفناها إن العرايس لما تبقى فرحانة أوي وسعيدة تبوس إيد جوزها أو كتفه أو تحضنه، ولكن واحدة ست تسجد في فرح شكر لربنا قدام الناس والصحفيين، مشوفناش الكلام ده قبل كده، ولكن كل واحد من حقه يعبر عن فرحته بالطريقة اللي تعجبه".

وتابعت: "تعليقي أنا على الواقعة بعيد عن ريم طارق إنه إزاي أنا واحدة ست هانم أنزل على ركبي ومنها علي الأرض قدام الناس بفستان الفرح ميصحش، وأنا كأنثي بأقول لا، ومشكلتنا والخوف لو تحول الأمر إلى ترند، وكل واحدة نلاقي ليها صورة وهي ساجدة في الأرض بفستان الفرح بتحمد ربنا على عريسها، ياريت يا بنات متعملوش كده أبدًا. لما أجي أحمد ربنا، ربنا موجود، فإحنا نقدر نحمده طول الوقت، مش لازم أعمل سحبة مايكل دي، وأفرد دراعي وأحمده قدام الناس بالشكل ده".