تامر حسني يوجه رسالة للمحبطين .. "إنت هتتسأل في ورقتك مش ورقة غيرك"

وجه الفنان تامر حسني رسالة للأشخاص المحبطين الذين دومًا لديهم وجهة نظر بأن أحلامهم لا تتحقق، كما أشار من خلال رسالته إلى أن سبب عدم تحقيق الأحلام يكمن في العقل الباطن ناصحًا الشباب بالتغلب على هذه المشكلة من خلال العديد من الطرق.

رسالة تامر حسني

مضيفًا: "أنا هشاور على سبب مهم وخطير من قراءتي كتير في اللي هقوله دلوقتي، طبعاً هقول سبب غير الأسباب المعروفه زي لو علاقتك سيئه بربنا أو بوالديك وأهلك، هقول سبب ممكن يكون مش في دماغ كتير مننا، كتير من صدمات حياتك سواء ليك ذنب فيها أو ملكش ذنب فيها أو لو ناس خذلوك أو كسروك لو ناس مش كويسة نجحوا وأنت شخص كويس ومعرفتش تنجح".

تامر حسني: "ركز في اللي جاي"

ووجه تامر حسني رسالته للشباب المحبط قائلًا: "ركز في اللي جاي عقلك الباطن ممكن يبقى هو السبب، يعني أنت السبب ورا كل ده عشان عقلك الباطن بعد الصدمات وبعد كل جرح خزن معاني غلط وأقنعك بيها أنها صح زي أنك شخص قليل متسواش وملكش قيمة، وخزن أن الطيبة مش كويسة ولازم تبقى شرير عشان تعرف تعيش، خزن أن الناس اللي غلط ربنا أداهم وخدوا حقهم والمجتهد والمحترم مبياخدش حقه والأفكار الغلط اللي اتسجلت دي".

تامر حسني: "أنا مش هفتكر الماضي ولو إفتكرته هقول كتر خيره علمني"

موضحًا: "عمال يطلع منها كل سلوكياتك الوحشة اللي بتجذبلك كل الوحش وتلاقي نفسك محبوس ما بين الغلط اللي جواك والغلط اللي بتخرجه براك وكمان أنت مئذي منه أنت واللي بتتعامل معاهم فا بتنجح في صنع طاقات سلبية رهيبة حواليك تزيدك في هدم نفسك، تخيل كل ده وأنت مش عارف أنك أنت السبب، عقلك الباطن بيخليك تصدق نتايج صدماتك أكتر من وعود ربنا، (( الحل)) أنك لازم تتعامل مع مخك أنه جهاز هتفتحه وترمي منه كل المعاني البايظة ومش بس ترميها ده أنتا هتبدلها بالمعاني الصحيحه اللي ربنا قال عليها زي أنا هحب الخير لغيري من قلبي أنا مش هتكلم على حد في ظهره أنا مش هيأس أنا هقدر أنا هوصل عشان ناس كتير غيري قدروا ووصلوا، أنا مش هفتكر الماضي ولو افتكرته هقول كتر خيره علمني حاجات كتير حتى لو فهمتها بعد فتره، وفي حاجات بعينها لازم تصلحها بجد بجد بجد".

تامر حسني: "مش هيكون جواك حلم لحاجة إلا وربنا جاعل جواك القدرة على تحقيقه"

وأنهى الفنان تامر حسني رسالته قائلًا: "ثقتك في الله مهما يحصل وتبقى قد اختباراته وتسلم لقضائه، ثقتك في نفسك واحترامك وتقديرك لشخصك وأنك مش قليل، تتمسك بالمبادئ مهما تشوف ناس ماشية غلط وبتنجح تعرف أن كل بني آدم وله اختباراته الشخصية الخاصة به هو وربه، فتخليك في اختباراتك أنت ركز في قصتك أنت مع ربنا يعني بلغة الامتحانات تخليك في ورقتك عشان في الآخرة أنت هتتسأل في ورقتك أنت مش في ورقة غيرك".

مضيفًا: متتعقدش فا تخلي اللي هتعرفهم بعد كده يدفعوا ثمن ذنب جراحك وشكوكك وصدماتك القديمة، وتبدأ صفحة جديدة بيضاء مع نفسك في كل اتجاهات حياتك وكأنك بدلت مخك بمخ جديد نضيف نشيط متزن واعي وبإذن الله هتعرف تشوف الحياة بطريقة جديدة جميلة وعايز أقول حاجة ممكن تطمن كل اللي بيحلموا وعندهم هدف نفسهم يحققوه، مش هيكون جواك حلم بحاجة إلا وربنا جاعل جواك القدرة على تحقيقه".