لمآ صالح "الأكثر إنتشاراً بين الأردنيات وهذه هي التفاصيل !

** من هي لما صالح ؟

عمري 19 سنة بدرس تربية رياضية في الجامعة الأردنية

** كم عدد المتابعين لصفحتك الشخصية على الفيسبوك؟

35 ألف أردني بيتابعني على الفيس بوك

** خبرينا شو قصة انتشارك السريعة بين الأردنيين؟

هلأ انا من زمان بكتب قصص عالفيسبوك من حوالي سنة ، مدمنة فيسبوك و هيك زي باقي الناس
بس ما كان خاطرلي هالقصص تنشهر هيك ..

الي صار انو قبل شهر بالزبط في قصة كتبتها انشهرت كتير و صارو الناس ينشروها ببيجات معروفة و جروبات و بأماكن كتيرة ..

فالناس عرفت بروفايلي عن طريق التاغات ، و خلال شهر صار في 30 ألف متابع وانا لسا مصدومة !!

** بتسببلك بوستاتك مشاكل بحياتك الخاصة ؟

من ناحية انو القصص بتسببلي مشاكل بحياتي الخاصة لأ ما بتسبب ، بداية كانت الناس تستغرب او أحيانا تفكر انو جد هاي القصص بتصير معي ، لكن حاليا صارت الصورة واضحة اكتر و صار الأغلب يعرف انو هي مجرد خيال و تأليف ، و حطيت توضيح جمب اسمي عالفيسبوك إنو " خيالها مشلول " مشان أي حدا بفتح بروفايلي يعرف .

** كيف اكتشفت أن لديك اسلوب ساخر في الكتابة؟

أسلوبي كيف اكتشفتو ، صراحة أصلا عمري ما كان ببالي إني أصير كاتبة أو حتى اكتب قصص ، هي تقريبا صارت صدفة ، من قصة مرة كتبتها ، و عجبت كم حدا من المقربين إلي ، و مرة بعد مرة أكتشفت انو خيالي الواسع ممكن اكتبو و أشاركو مع الناس مو بس اكتفي فيه لحالي ، لإني انسانة كتير بتسرح و بتتخيل و بتألف قصص و بتعيش قصص بخيالها

** ما هي المواضيع التي تستفزك للكتابة؟ وكيف بتختاريها ؟

غالبا شو المواضيع لبتخليني أكتب ، ما في اشي محدد ، كتير ظواهر و أشياء بتستفزني فعبر عنها بقصة ساخرة ، سواء بحياتي الجامعية أنا ، او بالبنات بشكل عام ، و حتى ممكن أحيانا اعبر عن أشياء بتستفز الذكور و همة بعانو منا احنا الاناث فيها ، يعني حاسة بكل الفئات و بعيش جو كل الفئات و الأعمار و الأجناس

هلأ أنا الفكرة من قصصي إنو بتصير معي مواقف أو بصير قدامي مواقف او بسمعها ! أو ممكن تخطر عبالي لحالها الفكرة
فمباشرة بس اجي أعبر عنها بقصة من خيالي و أحداث من خيالي بلاقي طلع معي قصة مضحكة بس بتوصف شغلة واقعية بتصير مع الكل

و الناس عجبتها القصص لإنها كتير بتشوفها بحياتها اليومية

أحيانا بتكون قصص مبالغ فيها او أنا مو مجربتها ولا عايشتها لكن الكلمات نفسها بتساعدني بتوصيل الفكرة للناس

** بتسببلك بوستاتك مشاكل بحياتك الخاصة ؟ وما هي وجهة نظر عائلتك بما تكتبه؟

بالنسبة لأهلي ، إمي و أبوي و اخوتي ، همة من أوائل متابعيني و بضحكو ع قصصي برضو و همة كمان مستغربين من خيالي الواسع ، بس الحس الفكاهي زي ما بقولو هو اشي معروف عني من و أنا صغيرة فمتعودين الجماعة .. أما من ناحية انو القصص بتسببلي مشاكل بحياتي الخاصة لأ ما بتسبب والحمدلله ..

** ما هي أكثر الأسئلة التي يطرحها عليك المتابعون؟

اكتر سؤال بوصلني من المتابعين ، انتي متجوزة ولا شو بالزبط ! نفس استغرابك يعني و السبب إنو في قصص لما اكتبها كوني بكل قصصي بحكي بضمير المتكلم ، فالناس من واقعية القصة بتفكرها جد ! و بتستغرب بس تعرف اني مش متجوزة ولا مرتبطة و لسا كمان عمري 19 كيف بحكي و كإني خبرة بالموضوع ! أنا نفسي مش عارفة بس انا جد ما تجوزت من قبل ..

وعلى فكرا ملاحظة لجميع القراء و كوني حطيت شخصية بطلة بقصة لا يعني نهائيا اني بدعمها أو بدافع عنها بالعكس بكون انتقدها أو اعبر عن انها بتستفزني ...

** من هو المتابع الذي لن تنساه؟

المتابعين الي كانو متابعيني و يدعموني دايما حتى قبل ما ينعرف اسمي ..

لماذا لا تتوجهين لإسلوب فيديوهات الستاندب كوميدي؟

هو الصراحة القاتلة .. أنا من وأنا صغيرة عندي حلم أطلع ممثلة ، لكن كان اشي مش منطقي الي و للي حولي ، لكن كتير بحس بالفترة الأخيرة انو حتى القصص الي بكتبها و بفكر فيها ، حابب تتصور اكتر من انها تنكتب ، لإنو لما تكون فيديو حقدر لسا اوصل فكرة اكتر من انها مكتوبة ، بس خلينا حاليا بصدمة الشهرة الكتابية .