بعد بلوغها السبعين من عمرها .. نادية الجندي : عايزة عريس ابن حلال

كشفت الفنانة نادية الجندي، عن طقوسها في استقبال العام الجديد 2023، مؤكدة أنها حريصة على قضاء الأيام الأولى من كل عام في أجواء روحانية، وتحدثت عن قبولها لعروض الزواج في العام الحالي، واشترطت أن يكون العريس "ابن حلال"، كما أشارت إلى الأسباب الرئيسية للحفاظ على مظهرها وقالت إن الفنان يجب أن يكون قدوة لجمهوره.

وقالت نادية الجندي خلال مداخلة هاتفية لبرنامج الستات: يا رب يجعلها سنة جميلة كلها أمل وحياة وسعادة، وتكون سنة مختلفة، وأنا شخصية متفائلة لأن بعد الصعاب بيجي الفرج والسعادة.

وعن طقوسها في العام الجديد، أضافت: بقى لي سنين ليا طقوس خاصة، وببدأ السنة بروحانيات ودعاء لربنا يجعلها سنة كويسة، لأن دي حاجات بتدي راحة نفسية، وبقعد في البيت مع ابني، ومش بحب الزحمة والأماكن المزدحمة والخروج وعلمت هشام ابني يعمل زي وبقى يلتزم معايا بنفس الطقوس.

وعن أمنياتها للعام الجديد قالت نادية الجندي: أتمنى أقدم عمل في السينما؛ لأنها في دمي وهي كل حاجة في حياتي؛ لأني لو ما وقفتش قصاد كاميرا أحس أني هموت وحياتي انتهت؛ ولأني من وأنا طفلة وعمري 13 سنة بمثل ومن 5 سنين بمثل في المدرسة، مردفة: لازم أقف قدام كاميرا في عمل أكون مقتنعة به، وسعيدة به وأنا بأديه وحاسة أني بعمل حاجة جديدة وشخصية مختلفة فيها تحدي، لكن اللي بيتعرض عليا أدوار مكررة وحاجات سطحية.

وعن مواصفات الشخص الذي تتمنى الزواج منه قالت: يكون ابن حلال بس مش طالبة أكتر من كده بمعنى أحس أنه سندي ومقدر قيمتي وحنون وأحس جنبه بالأمان لأن ده أهم إحساس في العالم.

وتحدثت نادية الجندي عن سر جمالها ورشاقتها، مشيرة إلى أن الفنان يجب أن يكون قدوة ونموذجًا للجمهور، وأن يحافظ على مظهره ولياقته، وأضافت: لما بحافظ على شكلي بحس إني بحترم جمهوري، ولما بيشوفوني بيقولوا لي إحنا بنحبك علشان بتحترمينا، لأن الفنان ما ينفعش يطلع بشكل تخين ومنظره كئيب، وده جزء من عملي إني أكون ملتزمة طول الوقت بشكلي ولياقتي البدنية، لإني بعمل أدوار صعبة وكلها أكشن وده جزء من عملي.

وأضافت: النهادرة الثقافة العامة إن الستات والرجالة يهتموا بشكلهم ورشاقتهم، وأصبح هناك اهتمام بثقافة الرياضة والرشاقة والتجميل ودي حاجة الناس ما كانتش بتهتم بيها زمان، ومالهاش عمر ولا سن سواء صغيرين أو كبار، لأن الوعي زاد أوي ودي حاجة جميلة.

وأكدت نادية الجندي على أهمية الرياضة، قائلة: الرياضة شيء مهم جدًا للناس كلها، والحرمان سر رشقاتي لأني حارمة نفسي من الأكل طول الوقت.

وأشارت نادية الجندي إلى أنه على الرغم من أهمية الرياضة فإنها جزء من الاهتمام باللياقة والرشاقة وليست الأساس، قائلة: هناك أمور أخرى مهمة أولًا ربنا فوق أي حاجة لأنه بيدي الإنسان الشكل الحلو والكاريزما والروح الحلوة اللي بتخلي الناس تحبه وتتقبله ولما يلبس أي حاجة بسيطة تكون فخورة به وحباه في كل الأوضاع لأن ربنا في كل اعتبار.

وأضافت: ثانيًا التصالح مع النفس لا تحقدي من حد ولا بتغيري لأن كل ده بيعمل تجاعيد وبيظهر على الوش بتلاقي الواحد شكله كئيب وكله غلّ، لكن لما تتصالحي مع نفسك وتتمني الخير لكل الناس بيطلع على وشك ويبان وعلى تصرفاتك وأسلوبك.

وأضافت: الإنسان لما يكون كئيب غير لما يكون سعيد والسعادة بتيجي من الرضا بالنفس وتبقي سعيدة وحابة كل اللي حواليكي.

وأكدت نادية الجندي أن الحرمان من الأكل يعد عذابًا، قائلة: الحرمان من الأكل بيخليكي مش بتاكلي أي حاجة غير حاجات معينة ولو كلتيها تأنبي نفسك وتعاقبيها وتمشي على نظام تاني علشان تعوضي اللي بوظتيه ودي تضحية أنك تحرمي نفسك من الأكل وإنك تلتزمي بالرياضة ونظام معين وتنامي بدري.