طبيب مغترب في امريكا يروي حكاية عمله بلا خبرة في اقسام الطوارىء بالاردن

نشر الدكتور محمد حجير الاردني المعترب في امريكا بوست مثير للجدل عبر صفحته الفيسبوكية.

وأكد حجير على أن الأطباء الجدد يعملون في اقسام الطوارىء بدون إرشاد أو تعليم.

وتاليا نص ما كتبه الطبيب الأردني.:

لما كنت في الاردن بعد ما خلصت امتيازي اشتغلت كمقيم طوارئ في وحدة من المستشفيات الكبيرة. متذكر اول يوم بديت فيه، كنا اكتر من مقيم. اجانا المسؤول و حكى وزعو الشيفتات و يلا استلم…. و منشوفك بكرة. بعدها اختفى! بدون تعليم ولا مراقبة !و الاخصائي في البيت بيجي تاني يوم الصبح و مسكر تلفونه

كنت خريج طب جديد و ميت خوف. ما عندي كان اي خبرة و لا اي تعليم ولا تدريب و حطونا انا و كمان غيري نستلم وحدة من اصعب الاماكن.

كان معاي كتاب اسمه واشنطن مانيوال وصميته كله. و حفظت اكتر الحالات شيوعا و شو نعمل. و فعلا اجو المرضى من اشي بسيط لمعقد! وعدد مرضى مهول! الامور الحمدلله مشيت. اشتغلت شهرين و بعدها اجيت على اميركا اتخصص. اكتشفت انه هون كل طوارئ بكون في اطباء اخصائيين درسو اربع سنين تخصص طوارئ و المقيم ممنوع يشوف اكتر من ٧ مرضى عشان يأثر على التعليم، و ممنوع اي مريض يروح البيت بدون ما يشوفه الاختصاصي و يكون عامل للمريض موعد مع دكتور طب الاسرة بعدها باسبوع للمراجعة.

الله يرحم الطفلة الي توفت و يصبر اهلها. الاخطاء الي بتشوفها هي نتيجة ضعف المنظومة الطبية و التعليمية! و بعض الناس ما بدهم تغيير و مبسوطين عل وضع! ولو ما تداركنا الموضوع رح يصير الوضع اصعب بكثير.