والدة الشهيد السواعير تكشف عن آخر ما قاله ابنها لها قبل أن يذهب لعمله ويستشهد

روت والدة الوكيل صهيب جمال عبدالكريم السواعيرالحوار الذي دار بينها وبين ابنها قبل أن يخرج لوظيفته ويستشهد خلال أداء واجبه في أحداث الكرك الارهابية.



هذا وأعرب مواطنون عن اعجابهم بالحوار الذي يدل على انتماء الشهيد ووالدته لوطنهما بالإضىافة الى التضحية بالروح من اجله حمايته.

وبحسب المعلومات الواردة فإن والدة الشهيد السواعير سردت هذا الحوار وهي تبكي بحرقة على فراق ابنها.

وتالياً نص الحوار:-يرضى عليك يمه ..أفطر قبل ما تطلع ...مشوارك على الكرك بعيد ..سلقت الك بيضتين وعملتلك ابريق شاي وهي صحن زيت. ..

-والله ما إلي نفس ياحجه ...لما أصل الكرك بشتري سندويشة شاورما وبطلع على المركز ....صار الي يومين مجاز ...حاس حالي زدت فيهم ثلاثه كيلو ....بس ياريت خالتي صبحه اجت لعنا اليوم ...

-خير يمه شو بدك فيها !!؟؟؟

-بدي تفسرلي هالحلم ...أول مره بحياتي بتذكر حلم كامل من أوله لأخره ..وخالتي صبحه بتفسر أحلام .

- انت بتصدقها يابنيه ...خالتك بتتهبل علينا ..واحنا صغار جدك الله يرحمه كان يذبحها من القتل ...كان يمسك مطرق هالرمان ..وين الجنب اللي بوجعك ...كانت تقول اجاها شيخ لابس أبيض في ابيض واعطها المرجه ...

-شو يعني المرجه يمه ؟؟!!!

-كان لم ينزلوا 'بنات الذنين ' يجوا أهل القريه يتمرجوا عندها. ...تحط على اديها زيت زتون وتصير تخنق بها الصغار ...مره كانت بدها تخنق حليمه بنت سالم العجارمة ....أبوي ذبحها يومها ..لليوم بعايرها في هظاك اليوم ..لولا امي الله يرحمها خلصتها من يديه
بس شو الحلم يا عين أمك !!!

- والله يا حجه شفت حالي لابس بدله بيضا ابيض من الثلج وماشي لحالي بشارع طويل ...وفي مية زرقا في نهاية الشارع بس بعيده كثير ....وشفتك بتضحكي ورحمة ابوي واقف في نهاية الطريق ومبسوط ...وبحكيلي يا الف أهلا وسهلا ....

-ولك هاي ما بدها خالتك صبحه الكذابه ...هاي بدنا نفرح فيك ...يلا هانت ظل سنه وبتخلص نسرين بنت عمك من جامعة البلقا ...وبنكتب كتابك عليها وبنحط مهرها ....ما شاء الله ...درست شو اسمها هاي اللي بقلولها طبيه وعمك بقول عندو واسطه بدو يشغلها في مستشفى الحمايده ...وراتبك على راتبها بتفتحوا بيت ...

-يلا يمه مع السلامه ..ساعه وبتحرك الباص من مادبا على الكرك ...وما بدي اتأخر بلا ما يطسني قائد المركز حجز أسبوع ..

-مع السلامه يا عين أمك .

- شو مالك لاحقيتني لباب الدار !!؟؟

-بدي املي عيني منك ...يابيه قديش تمنيت اليوم اللي اشوفك فيه لابس عسكري ...لو تشوف قديش زغردت لما تخرجت من الجناح العسكري في جامعة موته ...

-مؤته ياحجه...مش موته ههههههههه.

-انداري يمه ..خلص انا هيك بحكيها .

-صابرين تعالي يمه يا صابرين سلمي على اخوكي قبل ما يطلع ..

صابرين- :شو مالك يمه ...هو قديش بغيب ....!!؟؟..بغيب راسه من هون بطل رجليه من هون ..هههههه

-اسكتي لا تحكي هيك ....هاظ اخوكي عزوتك وتاج رأسك .

صابرين: ليش وانا بحكي غير هيك ...!!!

((( بعد 3 ساعات ...))).

صابرين :يمااااااااا ..يمااااااااا. ...اخوي استشهد بالكرك
........يمه يمه شو مالك !!!! ليش بتزغردي بقولك اخوي مات !!!!!!؟؟؟؟؟...قتلوه الكلاب ....

-يمه اخوكي امبارح حلم انه عريس .....روح الله يسهل عليك ..ويرضى عليك بعدد ما صدري در عليك ...مبروك عليك الشهادة يمه