عمر زوربا : هذا ما حصل معي في أول يوم بالسجن مع هذا الشرطي

كعادته كتب الناشط الفيسيوكي الساخر عمر زوربا عن تفاصيل اول ليلة قضاها بالسجن بعد أن تقدم نجل رئيس الوزراء الاسبق نادر الذهبي بتقديم شكوى رسمية تتهمه بالتشهير بعد منشور سابق كتبه بخصوص حفل زفافه .

زوريا الذي خرج من السجن بعد اسقاط الشكوى تحدث بطريقته الفكاهية عن ما حصل معه من موقف مع أحد رجال الشرطة المشرفين على محبسه .

وهذا نص ما كتبه زوربا :-

اول يوم انحبست كان فيه مباراه لريال مدريد ،،
ابصر شو صار حكي بيني وبين شباب بالغرفه ،، انا حكيت بصوت عالي ،، انا بدي اتفرج عمباراة مدريد خااااااااوة ،،
الا هو انفتح الباب و اجى ضابط ،، انا شفتو جاي قلت بعقلي راحت ع شبابك يا ابو زوربا ،، ندمت عالساعه اللي اختراعو فيها الفيسبوك !!
اجى الضابط بقول مين اللي بدو مباراة مدريد ،، وخاوه؟!
قلتلو انا شخصيًا بتابعش رياضه ، بحبش كرة القدم ، اصلا مضيعة للوقت ، اقولك ، اصلا الفطبل حرام ،، اصلا هدول كفار ، يلعن ابوهم ولاد كلب ،، ويلعني انا كمان !!
واحد قال : كذاب سيدي بدو يحضر المباراه !
بيقولي الضابط انتا مين بتشجع ؟!
هووون انا خشيت بمليون حيط مسلّح ،،
اذا قلت مدريد ،، خايف يطلع برشلوني!
و اذا قلت برشلونه ،، بطلع بعشق مدريد!
قلتلو انتا لمين ميال؟! انتا مين حابب ؟!
انا معك حتى لو بتشجع الاستثمار بالبلد ، حتى لو بتشجعش انا معك ، انتا قولي اي فريق بتحب وانا رح اصير اعشق ترابو ، رح اكتب ع ايدي اسمو !!
قلي مدريد ولا برشلونه؟!
انا انعجقت!
في واحد معنا قصير وخبيث وكذاب وسرسري ، صار يهمسلي من بعيد ويقولي بصوت واطي ( برشلونه )
انا ما ارتحتلو نهائيًا ، يا عمي قلبي ما اتطمنلو ، منا انقرصت قبل هالمره !
شوفو الحظ المفصّل الي شخصيًا :
على حظي الخرافي ، لمحت بالعقل بإيد الضابط مدالية خرز ، عليها شعار برشلونه !!
قلت بسسسسسس الضابط برشلوني كُح ،،
انا وقفت وقفة ثقة وحكتلو : بشجع برشلونة سيدي !!
بلا طول سيرة ،، المدالية اللي مع الضابط كاين ماسكها مع سجين برشلوني ومصادرها منو لانو الضابط مدريدي !!
طلع الضابط دمو مدريدي ، عروقو بتشجع مدريد ، طلع مش بس بحب مدريد ، طلع بيكره برشلونه ، بيكره اي شخص ميال للفريق الكتالوني ، طلع بتنفس هوى ريال مدريد !!
المهم هديك الليله كنت وانا نايم ، قالولي ثاني يوم اني كنت احكي وانا نايم ( كريستيانو ، مارسيلو ، راموس ، مدريد )
ولكو ميله هالقد عليي وعلى حظي الرياضي المايل المقوّس المقمل المتشرتح شرتحه !