صار معي سرطان بعد عرسي في ٣ شهور

صار معي سرطان بعد عرسي بـ 3 شهور، كنت أحكي لأمي إنه رأسي بوجعني ودايخة تحكيلي يمكن حسد، وبعد العرس حكتلي يمكن من الحمل، بس آخر مرة قلبت عالأرض، صحيت لقيت حالي بالمستشفى!

كان وجه أمي ما بتفسر؛ وزوجي واقف عجنب ومش عارف شو يحكي.

حكتلهم شو في؟

حكولي هلئ ارتاحي ما فيكي إلا كل خير.

ما بعرف كنت تعبانة كثير ومش مركزة بس ما صدقتهم.

بعد يومين، إجا زوجي ومسك إيدي، قلي حبيبتي بدي أحكيلك شغلة، تفاقيد ربنا رحمة!

وأنا عارف أنك قوية ورح تتحملي، عندك ورم صغير، بتتعالجي وبترجعي مثل أول وأحسن.

أنا وقتها انصدمت وصرت أعيط، قلتله رح أموت صح خلص ما في أمل احكيلي كم ضايلي.

قلي ولك بلا حكي مسلسلات مش رح تموتي، بس لازم تبلشي جلسات كيماوي.

هالكلمة وقعت على راسي مثل الصاروخ! وعطول خطر ببالي منظري كيف رح يصير، ووجع العلاج، وأكيد زوجي رح يتركني.

حكتله رح تتركني صح!

ضحك وقلي مالك انهبلتي مش رح أتركك، ورح أصير آجي أستناكي بعد كل جلسة.

بس أنا رفضت العلاج؛ قلتله بدي أموت هيك ولا أتعذب وأموت وأنا خسرانة كل شي وروحت عالبيت!

أجت أمي لعندي وأهلي وكلهم يقنعوني أتعالج ورفضت.

ثاني يوم لقيته جاي وحالق عالصفر كل شي!

اطلعت في وحكتله ليشششش بحب شعرك!

قلي خلص هيك بطلتي تحبيني يعني؟

قلتله: لا بحبك.

قلي إذنجهزي حالك للعلاج، وفعليا اقتنعت منه.

أول جرعة كيماوي، دخلت لحالي عالغرفة، حرقتني حرق، حسيت بنار بتمشي بجسمي، وللحظة شفت الموت، وبعد ما خلصت نمت كثيررررررر!

صحيت لقيته ماسك إيدي وجنبي، وبحكيلي كيف صرتي.

عيطت وحكتله متوجعة.

قلي رح تمشي.

وصارت حالتي بعد كل جلسة أخسر شعري؛ والشغلات الحلوة إلي فيي....

بشرتي كانت باهتة كتير وعيوني ذبلانين، كنت أتطلععزوجي بحسرة وأحكي شو ذنبه يعيش هالحياة معي....

بعد فترة من العلاج قللتله طلقني،،،، حسيت إني ظالمته معي، بتذكر وقتها عصب علي وصار يحكيلي حرام عليكي أنا مقصر معك بشي؟

قلتله لا والله بس أنا ظالمتك.

قلي هيك ربنا كاتبلنا ولو أنا صار معي هالشي متأكد ما تخليتي عني. ضلك قوية.

ثاني يوم كان عندي جلسة، كان في وحدة متزوجة معها سرطان كمان أشوفها قبل الجلسة دائما، كانت تحكيلي كيف زوجها طلقها بعد ما عرف إنها مريضة، وكيف دار حماها بعاملوها.

سألتها طيب انتي ما تزوجتي عن حب!

قالتلي حب 4 سنين.

وبعد هالحب تركك عشان مرضتي!

قالتها والحسرة بعيونها، للأسف كان يحب شكلي.

وقتها شفقت عليها جد، تذكرت كيف زوجي تقدملي بطريقة تقليدية؛ ورفضته، وبعدها رجع تقدملي ورجعت رفضته، ولحد ما تعرفت عليه وارتحتله وافقت عليه!

سألت الممرضة عنها، قالتلي اعطتك عمرها!

أنا وقتها صابني انهيار ما عرفت أتحكم بحالي، صرت أعيط وأحكي اكيد رح أموت مثلها. أجا زوجي لعندي وشافني هيك انجن قلي شو في؟

حكتله القصة زعلللل كثير وحضني، قلي والله رح تعيشي هسا كنت عند الدكتور وحكالي إنك متحسنة كثير.

فتت عالجلسة وطول الوقت وصورة الست للي ماتت براسي؛ يا الله أكيد ماتت من حسرتها، أكيد ماتت وحيدة ولا حدا كان معها.

طلعت بعدها ... وضليت فترة مكتئبة كثير، بس زوجي ما قصر ليغيرلي جو، يحسن نفسيتي، يساعدني بكل شي.

كنت حابة كل ذرة بحياتي مشانه بس! عشانه كان قوتي وقت ضعفي.

فعليا أنا انشفيت من هالمرض، وحياتنا رجعت طبيعية وصار عندي بنوتة اليوم سميتها على اسم الست الي شفتها بالمستشفى! بس دائما أحكيلها أوعك يا ماما تتزوجي واحد حَب شكلك وبس، تزوجي واحد حب روحك الحلوة، عقلك الكبير، تفكيرك!

تزوجي عشان لو وقعتي يوقف معكوما يتركك!

طبعا بنتي بتصفن ومش فاهمة شي... بس بتحكي أتزوج واحد مثل بابا؟

حكتلها اه.. تزوجي عشان الزواج استقرار، تزوجي الشخص الي بدك تقضي كل عمرك معه لو شو ما صار لأي حدا فيكم.

تزوجي الي حب قلبك وروحك مش الي حب شكلك، واعرفي إنه الزواج في أيام حلوة كثير وفي أيام مرة ! بس مع اللي بحب روحك كل الزعل رح تنسيه.

أجا زوجي وقلي شو بتنمي انتي وبنتك

قلتله بنَمفيك، عشانك مش منيح بالمرة".

الكاتبة: هديل قاسم