وزير اتصالات سابق يشكو "التعقيدات"..: "غير هيك بزم أغراضي واترك زي الي سبقوني"

في تعليق له لم نعتد على سماعه حينما كان وزيرا للاتصالات قال مراون جمعه ان هناك "تعقيدات" تواجه الرياديين الذين يرغبون بإقامة مشاريع في الاردن.
جمعة قال في منشور على صفحته على "فيسبوك" معلقا بنبرة ما بعد الوزارة التي عودنا عليها المسؤولين السابقين : "خففو شوي التعقيدات لتسجيل شركتي ومش معقول في 2017 لسى لازم اختم وابصم وارجع دوائر".
لماذا تقم معاليك والوزارة التي تسلمتها معنية بهذا الشأن ، بأتمتة الخدمات الحكومية ؟.
يضيف جمعة " ما تغيرو قوانين اللعبة مليون مرة وكونو واضحين من الاول ، ساعة ضريبة دخل 20 وساعة 10 % وساعة في ضريبة وساعة ما في ، وحتى لو بدي انفي زي غيري بدي سنة لافهم وين وكيف !.
ويتابع مهددا : "انا ابن بلد وبحب الاْردن وعقلي هو ثروتي!! ساعدوني اشتغل هون وابقى هون لانه بالآخر رح أفيد البلد واكبر واوظف!! غير هيك رح آزم أغراضي واترك زي صحابي اللي سبقوني…. انا ريادي….”"

التالي نص ما كتبه كاملا

انا ريادي ابن بلد وحاب أبقى هون! فكرتي غير وبتحل مشكلة وعندي طموح وبدي اتعب على حالي ومش هامني اللقب ولكن

١. خففو شوي التعقيدات لتسجيل شركتي! ومش معقول في ال ٢٠١٧ لسا لازم اختم وابصم وأراجع دوائر…. وبعدين كل اللي معي قرشين مش معقول أحط نصهم على تسجيل الشركة بس!

٢. مش معقول اقعد شهرين لالآقي واحد عنده نص عقل وبعرف يحكي كلمتين في المقابلة وعنده شبه سيرة ذاتية! اصحو يا جامعات عندكو مشكلة كبيرة بمنتجكم!!

٣. خففو عني المصاريف لو لأول سنة او سنتين لاوقف على رجلي! مش معقول الضمان صار فوق ال ٢٢٪‏ وبلاش احكي عن الكهرباء وغيرهم من المصاريف!! هيك بطل في قروش لابني منتج زي العالم والنَّاس!!

٤. ما تغيرو قوانين اللعبة مليون مرة وكونو واضحين من الاول!! ساعة ضريبة الدخل ٢٠ وساعة ١٠٪‏! وساعة في ضريبة مبيعات وساعة مافي، وحتى لو بدّي انعفي زي غيري بدّي سنة لأفهم وين وكيف!!

٥. بعرف مش سهل بس مولو فكرتي المرتبة يا بنوك! انا علي اجهز حالي واجيب اول تمويل وأعطيكم شي واضح بس لما بدّي اكبر ما تطلبو مني كفالات لانه لا عندي مال على جنب ولا ارض أرهنها! اصلاً لو عندي كان ما جيت عليكم من الاول!! وبعدين ١٢٪‏سعر فائدة بهد المشروع قبل ما يبلش!!

٦. ثقوا فينا يا شركات كبيرة ويا حكومة وحطولكم جزء معين من مشاريعكم، حتى ولو ١٪‏ النا نحن الصغار!! ما بدنا هبات بس بدنا فرصة ننافس وناس تثق فينا!!

٧. واذا مشروعي الاول فشل، والارجح رح يفشل، ساعدوني أسكر شركتي بسهولة وأروح لمشروعي الثاني وما تعتبروني مجرم لانه اللي ما بفشل ولا عمره ينجح!

انا ابن بلد وبحب الاْردن وعقلي هو ثروتي!! ساعدوني اشتغل هون وابقى هون لانه بالآخر رح أفيد البلد واكبر واوظف!! غير هيك رح آزم أغراضي واترك زي صحابي اللي سبقوني…. انا ريادي….