نشر طالب جامعي في السنة الثالثة على صفحته الشخصية على الفيسبوك صورة لأرقام الجلوس لديه ، والتي كانت له خلال تقديمه لامتحانات التوجيهي .

وكتب الطالب رسالة وجهها لجميع الطلبة الراسبين في امتحانات الثانوية العامة ، والتي تم اعلانها صباح اليوم الاثنين ، وقال :

شايفين هاي كلها.. كروت الجلوس تبعتي اللي قدمت فيها..
قديش رسبت وقديش حاولت وقديش ناس حكوا عني فاشل...
وبالاخير قررت انجح ونجحت...
هسا سنة ثالثة جامعة، وبشتغل ووضعي أحسن من وضع صحابي اللي نجحوا من أول مرة ومش مستحي اضل اعيد وازيد في القصة، وبفتخر بمحاولاتي...
ما تعتبرها فشل لإلك شخصياً, إعتبرها محاولة.. وحاول مرة جديدة...
اكيد تعلمت شي جديد من تجربتك هاي, وراح تتعلم شي جديد من تجاربك الجاية، ما في شي بستاهل تندم عليه الا الوقت اللي بتضيعه بالندم...
حاولت وفشلت محاولتك !! قوم يلا... شد حيلك وحاول من جديد وتعلم من غلطك.. ومن محاولاتي كمان تعلم...
ومش ضروري الواحد ينجح من أول مرة ليحقق اللي بده إياه... أديسون عمل 999 محاولة لحتى إخترع المصباح...
وهاي إحنا ... بدون يأس وبدون هبل وعناد ..
النجاح الكبير بده وقت، والحياة كلها معنا، لحتى نحاول ونحاول ونحاول لحد ما نوصل للحلم الكبير ونرفع راسنا قدام العالم ونحكيلهم قديش كانت حلوة محاولاتنا الفاشلة وقديش أثرت فينا...
قوموا واطلعوا وشوفوا العالم واعترفوا بفشل محاولتكم مش فشلكم وراهنوا العالم كله على نجاح محاولتكم الجديدة...
وراح تنجحوا أنا متاكد... آمنوا بحالكم.. وآمنوا بقدرتكم على النجاح، وخلينا نشوفكم كمان 10 سنين مسؤولين قد الدنيا في هالبلد..